.jpg)
Хамит Барсұлы Ермағамбетов
Хамит Барсұлы Ермағамбетов 1916 жылдың желтоқсанында Торғай уезінің №7 ауылында туған. 1922 жылы, әлі толық алты жасқа жетпей анасынан айырылады. Хамитты балалар үйіне тапсырады.
1934 жылы зооветтехникумның студенті аталады. Техникумды тамамдаған соң Алматы ветеринарлық институтына оқуға түседі, оны 1940 жылы аяқтайды. Осы жылдан малдәрігері ретінде Петропавловск қой шаруашылығында оның еңбек жолы басталады.
Жас маманға тәжірибе жүзінде өз білімін іске асыру мүмкіндігі көпке созылған жоқ. 1941 жылдың сәуір айында Қызыл Армия қатарына шақырылады, осы жылдың тамыз айында 25 жасар Хамит Ермағамбетов майданға аттанады. Оның жеңіске дейінгі жолы ауыр және ұзақ болады. Қатардағы жауынгерден офицерге дейін жеткен Ермағамбетовке Украинаның 1, 2 және 3 майданының әскери бөлімдерінде шайқасқа түсуіне тура келеді. Азат етуші жауынгер ретінде ол Абаян, Курск, Суджа, Сумы, Ромны, Полтава, Киев, Фастов, Белая Церковь, Плоешти, Буковина, Ужгород, Вена, Грац қалалары арқылы өтеді. Оның қызметі 1945 жылдың қараша айында аяқталады. Екі жылдай Винница қаласында жергілікті ет комбинатында малдәрігері болады. Бірақ Отанға деген сағыныш жетелеп, екі жылдан кейін қайтып келіп, Жетіғара ет шаруашылығына жұмысқа тұрады..
1948 жылы Нұра ауданына қоныс аударады. Мұнда 32 жасында Маржанкөл шаруашылығының директоры болып тағайындалады. 1950 жылы Қарағанды облысының шаруашылықтар тресінің бас малдәрігері қызметін атқарады, бұл мекемеде ол 3 жыл еңбек етеді. Келесі бес жыл ішінде ол Осакаров ауданының Восход шаруашылығының малдәрігері қызметін атқарады. 1958 жылдан бастап қана Нұра ауданында, аудандық ауылшаруашылық басқармасының бас малдәрігері қызметінде істейді. 1988 жылы осы мекемеден зейнеткерлікке кетеді.
1999 жылды 16 қыркүйегінде Х. Ермағамбетов Нұра ауданының Құрметті атағын тұңғыш рет иеленген азамат. 2003 жылы дүниеден озады.
